Ntọ̀ na Igbu Ọchụ: A Na-achọ Dibịa nà Mmadụ 20 Ndị Ọzọ Nọ́ n'Ọsọ Ugbua Achọ n'Anambra

Ntọ̀ na Igbu Ọchụ: A Na-achọ Dibịa nà Mmadụ 20 Ndị Ọzọ Nọ́ n'Ọsọ Ugbua Achọ n'Anambra
Ndị ahụ a na-achọ achọ

.

Izunna Okafor dere akụkọ a


Ọ na-abụ ọkụkọ nyụọ ahụrụ, ala achụba ya ọsọ.

Ka ọ dị taa, ndị uweojii steeti Anambra ekwuwaala na ha na-achọ otu onye a na-enyo ènyò na ọ bụ dibịa, ya na mmadụ 20 ndị ọzọ achọ ugbua, bụ ndị nọ n'ọsọ, ma bụrụkwa ndị a na-enyo ènyò na o nwèrè ihe ha ma banyere ọnwụ mmadụ abụọ dapụtàrà na nsonso a n'obodo Ogwu-aniọcha dị n'okpuruọchịchị ime obodo Ogbaru dị na steeti Anambra, ya na ntọ̀rọ́ a tọ̀ọ̀rọ̀ eze ọdịnala obodo ahụ, bụ Igwe Oliver Chike Nnaji (Ezechukwukwadolu, nke atọ).

Onye na-ahụ maka mmekọrịta ọhaneze na ndị uweojii n'ime steeti Anambra, bụ DSP Toochukwu Ikenga bụ ya mere ka ụwa mara nke a site n'ozi ọ kụpụụrụ ndị ntaakụkọ na nsonso a n'Awka bụ isi obodo steeti ahụ.

O mere ka a mara na mmadụ abụọ ahụ e gburu egbu n'obodo ahụ na nsonso a bụ Chiifu Ajieh Anthony Nwanasor, na Chiifu Ikenna Ugochukwu; ma rịọkwazie onye ọbụla ma maọbụ nwee ozi ọbụla bara uru banyere onye ọbụla n'ime mmadụ iri abụọ na otu ahụ a na-achọ achọ maọbụ ebe a pụrụ inwete ha, ka onye ahụ kpọtụrụ ma mee ka ndị ọrụ nchekwa mara.

Dịka o siri kpọpụta, mmadụ iri na otu ahụ gụnyèrè: Okwudili Ogana, Chidi Ekpendu, Chukwunonso Udom (onye e ji Pikin wee mara), Amechi Akachukwu, Emmanuel Ejiofor, Christian Udeze, Chikezie Onwuka (onye e ji Osy Torture wee mara), Iweka Odogwu, Chimezie Okonkwo (onye e ji Danger wee mara), na Onochie Nwabugwu (onye e ji Young PG wee mara).

Ndị ọzọ gụ̀nyèrè Anayo Ubadi (onye e ji Agunechemba wee mara), Chibueze Egwenu, Charles Obi,  Aboy Udom, Chinedu Collins Nwonani, Onyebuchi Umuna (onye e ji Omeke wee mara), Ifeanyi Mbanugo (onye e ji Acid wee mara), Sunday Osadebe, Nduba Chibuzor, Amechi Adama, na Azuakonam Anyakodia. 

Bànyéré okwu ahụ a kpụ n'ọnụ, onyeisi ndị uweojii na steeti Anambra, bụ CP Echeng Echeng nyèkwàzịrị ụmụafọ steeti Anambra na ndị obodo Okwu-anịọcha owuweanya ma kwe ha nkwà na ụlọọrụ ya ga-aga n'ihu ịgbasi mbọ ike iji nwụchikọọ ndị ahụ a na-enyo ènyò ma hụkwa a gbásòrò usoro ikpe nkwụmọtọ.

O jikwazịrị ohere ahụ rịọ Ndị Anambra na ọhaneze ka ha nyere ndị ọrụ nchekwa aka n'ọrụ ha site n'inye ha ozi dị mkpa na ozi bara uru ga-enye aka ime ka ọrụ ha gaa siriri-werere. O kwekwàrà nkwà na ha ga-ekpùchi ma gharakwa ikwupụta aha maọbu ihe banyere onye ọbụla nyere ozi dị mkpa.