E Nyela Ndị Ajadụ Na Ụfọdụ Ndị Nne Ọzụzụ Maka Ịkwụrụ Onwe Ha

Izunna Okafor dere akụkọ a

A kpọkuola ụmụnwaanyị ajadụ na ụmụnwaanyị ndị mụrụ nwa na-alụghị di ka ha guzosie ike ma gbasikwa mbọ ike n'onwe ha iji bụrụ ndị kwụụrụ onwe ha ma na-achụtanwukwa ihe ha na ndị ezinụlọ ha ga na-eri na-adabereghị n'onye ọbụla.

Oku a bụ isi sekpụ ntị na mmemme inye ọzụzụ na nkụzi otu ụbọchị a chịkọbara maka ụmụnwaanyị ahụ, bụkwa nke weere ọnọdụ n'Awka na nsonso a, ma bụrụkwa nke isiokwu ya bụ “Maka Gịnị Ka Ị Ga-Eji Nọdụ Ebe A? Gịnị Ọzọ?.

Ya bụ mmemme inye ọzụzụ bụkwa nke ọ bụ ndị òtù ‘Futureholds True Value-Impact Foundation’ chịkọbaara ụmụnwaanyị ahụ.

N'okwu ya n'ebe ahụ, onyeisi ndị òtù ahụ, bụ Oriakụ Ncheta Chidubem-Nwachinemere kwuru na ebumnobi ọzụzụ ahụ bụ iji gbanweer ọnọdụ ụmụnwaanyị ahụ nà akụkọ ndụ ha, dịka o siri metụta ihe dị icheiche chere ha n'ihu na ihe ha na-agabiga. Ọ kọwara na òtù ahụ na-elekwasị anya n'ihe dị icheiche metụtara ịkwàdó na ime ka mmadụ kwụrụ onwe ya, ma ụmụ na-eto na ndị ntorobịa enweghị nne na nna,  ụmụnwaanyị, ọkachasị ụmụnwaanyị ajadụ na ụmụnwaanyị ndị ọzọ mụrụ nwa n'enweghị di; ma sịkwa na ha na-eme ka ndị dị otu a bụrụ ndị na-agbasi mbọ ike ma na-enyekwa, ma sikwazie n'ụzọ dị etu ahụ na-atụnye ụtụ n'ịkwalite mmepe na ọdịmma obodo.

Ọ kpọkukwazịrị ụmụnwaanyị ahụ sonyere n'ọzụzụ ahụ ka ha tinye ihe dị icheiche ha mụtara ebe ahụ n'ọrụ ma jirikwa ihe dị icheiche a kụziiri ha nyere onwe ha na ezinụlọ ha aka.

Na mbụ na nkụzi ya, onye ọbịa nyere nkụzi na mmemme ahụ, Maazị Paul Umeokoli kọwaara ụmụnwaanyị ahụ mkpa ọ dị ha ịbụ ndị na-ekepụta akụnụba ma nwee ihe bara uru ha na-eme, ka ha wee ghara ịdaba n'ọnọdụ ọjọọ, ihe egwu, maọbụ ihe izendụ ọbụla nwere ike ịdabụta site na ha ịdabere na mmadụ maọbụ tụkwasị obi n'ịchọ onye ga-enyere ha aka.

Ọ gwakwara ha ka ha ghara ịbụ ndị ‘ọbanaka ọbanọnụ’, kama ka ha bụrụ ndị ma echekwa ego nke ọma ma na-echekwa ọbụladị obere ego ha na-enwete site n'ihe dị icheiche ha na-eme.

Ụfọdụ ndị ọzọ nyere nkụzi na mmemme ahụ, nke gụnyere Ọkaiwu Faith Nwabachili, na Oriakụ Blessing Achebe nyere ụmụnwaayị ahụ nkụzi usoro dị icheiche ha ga-agbaso oge ọbụla mmadụ megidere ikike dịịrị ha, ma gwakwa ha ka ha kwụsị ịdabere maọbụ ịtụkwasị obi na mmadụ.