Ndị Ụka Sabbath Agbanweela Aha, Machie Iyi Uwe Ọcha Oge Niile

Izunna Okafor dere akụkọ a

Ọ na-abụ a sụọ ụtara, sụọ ụtara, e hogharịa ọdụ.

N'ịgbaso nke a, ndị ụka uwe ọcha ahụ a maara dịka ndị ụka ‘Our Lord’s Sabbath Mission’, nke e ji ụka ‘Sabbath’ wee mara nọ̀rọ̀ na nsonso a wee gbanwee aha ụka ahụ ka ọ zabazie ‘Our Lord the Saviour Covenant Church’.

Onyeisi ụka ahụ n'ala Nigeria, bụ Chigozie Nwaka bụ ya kwupụtara nke a na mmemme pụrụ iche ndị ụka ahụ chịkọbara, bụ mmemme oriri nke mụọ nsọ ‘Feast of Pentecost’ nke ahọ 2022. O kwuru na mgbanwe aha ahụ so n'otu n'ime mnwògharị pụtara ihe ụka ahụ gabigagoro na nsonso a n'okpuru nlekọta ya. 

O kwukwara na akwụkwọ na ihe ndị ọzọ niile ụka ahụ nwere na mbụ, nke bu aha ochie ahụ ka dịkwa ire ma na-arụkwa ọrụ; ma dọọ aka na ntị megide onye ọbụla iji ya mee mpụ maọbụ ihe ọbụla ezighị ezi n'aha ụka ahụ, maka na a ga-eji usoro iwu wee nyụcha onye ọbụla mere ihe dị otu ahụ anya.

Nwaka gakwara n'ihu kwuo nà malite ugbua dịrị gaba, na ọ bụghịzị iwu na onye ọbụla ga na-eyi akwa ọcha wee bịa ụlọụka ahụ, dịka ha si eme ya na mbụ; nke pụtara na mmadụ nwezịrị ike iyi akwa ọbụla dị mma masịrị ya wee bịa ụka ahụ malitezie ugbua gaba.

Ọ kpọpụtasịkwara ụfọdụ ihe ndị ọzọ dị icheiche ọ gbanwegoro n'ụlọụka ahụ, ma kwuo na a ga-agakwa n'ihu na-enwogharịsị ụfọdụ ihe ndị ọzọ dịka oge na-aga, dịka o siri bụrụ mmasị nke Yahweh, na site n'odudu nke mụọ nsọ.