Soludo Akpọlitela Mmadụ Asatọ Ọzọ n'Ọkwa Ọhụrụ
![Soludo Akpọlitela Mmadụ Asatọ Ọzọ n'Ọkwa Ọhụrụ](https://igboradio.com/uploads/images/202204/image_750x_625ee0d16090e.jpg)
Izunna Okafor dere akụkọ a
Aka na-achị steeti Anambra, bụ Ọkammụta Chukwuma Soludo akpọlitela mmadụ asatọ ọzọ n'ọkwa ọhụrụ dị icheiche na gọọmenti ya
Mkpọlite n'ọkwa ọhụrụ a a bụ nke bịara ka ọ gachara ihe dịka mkpụrụ ụbọchị iri atọ na abụọ e jiri duo ya n'iyi ọrụ dịka aka na-achị steeti ahụ, ma bụkwa nke e mere ka ụwa mara site n'ọnụ Kọmishọna na-ahụ maka mgbasaozi na steeti ahụ, bụ Maazị Paul Nwosu, site n'ozi ọ kụpụụrụ ndị ntaakụkọ ụbọchị Tuzdee.
Dịka o siri kọwaa, ndị ahụ a kpọlitere n'ọkwa ọhụrụ nà ọkwa ha gụnyere: Maazị Chukwuemeka Fred Agbata (onye a kpọlitere n'ọkwa dịka onyeisi ụlọọrụ ‘ICT Agency’); Maazị Chike Anyaonu (onye a kpọlitere n'ọkwa dịka onyeisi ụlọọrụ ‘Anambra State Housing Development Corporation’); Maazị Joe Anatune (onye a kpọlitere n'ọkwa dịka onyeisi ụlọọrụ ‘Anambra State Signage and Advertising Agency’); na Maazị Okey Ezeobi (onye a kpọlitere n'ọkwa dịka onyeisi ụlọọrụ ‘Anambra State Bureau of Public Procurement’).
Ndị ọzọ gụnyere: Maazị Christian Aburime (onye ọ kpọlitere n'ọkwa dịka odeakwụkwọ mgbasaozi ya); Ọkaiwu Tochukwu Nweke (onye ọ kpọlitere n'ọkwa dịka onye ndụmọdụ pụrụ iche n'ihe gbasaara amụma iwu); Dọkịta Nelson Omenugha (onye ọ kpọlitere n'ọkwa dịka onye ndụmọdụ pụrụ iche n'ihe gbasaara nkwàlite ndị ntorobịa); na Maazị Bob-Manuel Udokwu (onye ọ kpọlitere n'ọkwa dịka onye ndụmọdụ pụrụ iche n'ihe gbasaara ime obi añụrị, mmesapụahụ na njem nlegharịanya).
N'okwu ya banyere nke mkpọlite ahụ a kpọlitere ya, onye ndụmọdụ pụrụ iche n'ihe gbasaara ime obi añụrị, mmesapụahụ na njem nlegharịanya, bụ Maazị Bob-Manuel Udokwu, onye bụkwa onye na-eme ejije a mà àmá kèlèrè Gọvanọ Soludo maka ịhụta ya dịka onye tozuru oke maka ya bụ mkpọlite.
O kwezịrị nkwà iji ahụmahụ ya wee jeere steeti ahụ ozi ọzọ n'ikwesi ntụkwasịobi, ya na ịrụ ọrụ ahụ a hànyèrè ya n'aka nke ọma karịa ka a tụrụ anya.
Ọ dị ncheta na Maazị Udokwu jikwara ọkwa dịka nnukwu onye ndụmọdụ pụrụ iche nye gọvanọ n'oge ọchịchị nke Gọvanọ Willie Obianọ gwụrụ agwụ na nsonso a.
What's Your Reaction?
![like](https://igboradio.com/assets/img/reactions/like.png)
![dislike](https://igboradio.com/assets/img/reactions/dislike.png)
![love](https://igboradio.com/assets/img/reactions/love.png)
![funny](https://igboradio.com/assets/img/reactions/funny.png)
![angry](https://igboradio.com/assets/img/reactions/angry.png)
![sad](https://igboradio.com/assets/img/reactions/sad.png)
![wow](https://igboradio.com/assets/img/reactions/wow.png)