Onyeisi NCAA Agaala Njem Nleta n'Ebe A Na-Arụ Ọdụ Ụgbọelu Anambra

Izunna Okafor dere akụkọ a

Onyeisi ụlọọrụ ahụ na-ahụ maka njem ụgbọelu n'ala Nigeria a maara dịka ụlọọrụ 'Nigeria Civil Aviation Authority' (NCAA), bụ Capt. Nuhu Musa etoola gọọmenti steeti Anambra maka agadaga ọrụ o ji n'aka n'ebe ahụ ọ na-arụ ọdụ ụgbọelu n'Ụmụeri dị n'okpuru ọchịchị ime obodo Anambra East nke steeti ahụ. 

Maazị Musa kwupụtara nke a oge ọ gara njem nleta n'ebe ahụ a na-arụ ya bụ ọdụ ụgbọelu mba ụwa, ya na aka na-achị steeti Anambra bụ Gọvanọ Willie Obianọ; odeakwụkwọ ukwu steeti ahụ, bụ Ọkammụta Solo Chukwulobelu; Kọmishọna na-ahụ maka ọrụ na steeti ahụ, bụ Maazị Marcel Ifejiofor, nakwa ụfọdụ ndị ọzọ selitere isi n'ọrụ gọọmentị.

N'okwu ya oge ọ gagharịchara wee hụ ka ọrụ si aga n'ebe ahụ, Maazị Musa kọwara na ogoogo e ji arụ ya bụ ọdụ ụgbọelu bụ nke dabara adaba ma bụrụkwa nke kwụdisiri ike ma gbasokwa ogoogo mba ụwa n'eziokwu, n'ilekwasị anya n'etu e si arụ ya.

Ọ gbara akaebe na akụkụ ebe ahụ a maara dịka 'Control Tower' nke ọdụ ụgbọelu ahụ so na nke kacha mma n'ala Nigeria niile gbaa gburugburu, ma kọwakwa na ihe niile a chọrọ zùrù òké n'ebe ahụ, bụ nke na-egosi na ọ bụghị egwuregwu ka gọọmentị Anambra na-egwù n'ebe ahụ, maka na ọ kwadoro akwado.

O kwukwazịrị hoohaa na a rụchaa ya bụ ọdụ ụgbọelu, na ọ ga-enye aka n'ịkwalite ọnọdụ akụnụba na ọnọdụ mmepe mpaghara ebe ahụ na steeti Anambra n'izugbe.

Na mbụ n'okwu ya oge ọ na-edugharị ya n'ebe ahụ, Gọvanọ Obianọ nyere nkọwa banyere etu ya bụ ọrụ si aga, ma kwunwòó na ya bụ ọdụ ụgbọelu ga-amalite ịrụ ọrụ oge adịghị anya.

Gọvanọ Obianọ mere ka a mara na ya bụ ọdụ ụgbọelu ga-enye aka n'ọtụtụ ụzọ dị iche iche n'ịkwàlite ọnọdụ mmepe steeti ahụ, tinyere ọtụtụ úrù ndị ọzọ ọ ga-ewèta ma a rụchaa ya; ma kwekwazie nkwa ịgbasi mbọ ike hụ na a rụchara ya bụ ọrụ n'oge ahụ a kàrà àkà.