N'Anambra, Otu Ụgbọala Asụnyela Isi n'Ọwà Mmiri

Izunna Okafor dere akụkọ a

Otu ụgbọala 'Nissan Xterra Jeep' enweela ihe mberede okporoụzọ, wee sụnye isi n'ọwà mmiri n'Awka, bụ isi obodo steeti Anambra.

Onye mere ka ụwa mara nke a bụ SRC Florence Edor, bụ onye na-ahụ maka mgbasa ozi n'ụlọọrụ 'Federal Road Safety Corps' (FRSC), ngalaba steeti Anambra, site n'ozi ọ kọpụụrụ ndị nta akụkọ n'Awka bụ isi obodo steeti Anambra bànyere nke ahụ.

O kwuru na ihe mberede ahụ dapụtara n'okporoụzọ awara awara ahụ siri Enugu gaa Ọnịtsha, ma bụrụkwa nke mere oge onye na-anyà ụgbọala (nwéré ákàrà efere ENU 612 AE), bụ Maazị Osita Obi chọrọ ka o zèére ụgbọala ọzọ si n'akụkụ ebe ekwesighị ekwesi wee kwòró ọsọ na-abịa na ncherịta ihu ya; ụgbọala ya wee dakpuo n'ime ọwà mmiri dị n'akụkụ ụzọ ahụ, ebe ọ na-ezè ya bụ nwoke na ọnwụnwa ya.

SRC Edor mezịrị ka a mara na e nweghị onye ọbụla nwụrụ maọbụ nweta mmerụahụ ọbụla na ya bụ ihe mberede okporoụzọ.

N'okwu ya banyere nke ahụ, onyeisi ụlọọrụ FRSC na steeti ahụ, bụ CC Andrew A. Kumapayi dọrọ ndị na-anyà ụgbọala aka na ntị banyere imegide maọbụ inupù isi nye iwu na-achị okporoụzọ, bụ nke o kwuru na ọ na-ewèta ọtụtụ ihe mberede okporoụzọ n'ụdị dị icheiche.

Dịka ọ na-echetara ndị na-anyà ụgbọala na onye ọbụla e jidere ka ọ na-enupu isi n'iwu na-achị okporoụzọ bụ onye dara nnukwu iwu, ma bụrụkwa onye a ga-ádà nha puku naịra ise maọbụ a tụọ ya nga ọnwa isii, maọbụkwanụ e mee ya ihe abụọ ndị ahụ.