Karama Akụwasịala Dịka Ihe Mberede Okporo Ụzọ Dapụtara n'Ọnịsha

By Izunna Okafor

Ọtụtụ karama mmanya adịghị n'ime ha kụgwòsiri n'Ọnịsha dị na steeti Anambra na nsonso a, dịka otu nnukwu ụgbọala gwongworo e ji ebu mmanya nwèrè ihe mberede okporo ụzọ.

Nke a bụ nke e mere ka ụwa mara site n'ozi a kụpụrụ nsonso a site n'aka onye na-ahụ maka mgbasa ozi na ịkụziri ọhaneze ihe ha kwesiri ịma n'ụlọọrụ 'Federal Road Safety Corps', FRSC (ngalaba steeti Anambra), bụ Oriakụ Edor Florence.

Dịka o siri kọwaa, ya bụ ihe mberede okporoụzọ bụ nke mere na mpaghara Upper Iweka, ma bụrụkwa nke dapụtara n'etiti ụgbọala atọ, bụ nnukwu ụgbọala gwongworo ahụ e ji ebu mmanya Coca Cola (nwéré akàrà efere WDE 711 YE) na ụgbọala 'RS300 Lexus Jeep' (nwéré akàrà efere ABJ 929 SR) na ụgbọala 'Suzuki Shuttle Bus' (nwéré akàrà efere AWK 161 YZ).

Ndị ọnọmgbeomere na-akọwa na ọ bụ ịgba oke ọsọ kpatara ihe mberede okporoụzọ ahụ, bụ nke dapụtara oge nnukwu ụgbọala ahụ pụnahịrị onye na-anya ya n'aka, wee danyeziere ụgbọala abụọ ndị ọzọ; ọtụtụ karama wee dàá ma laa n'iyì. 

Ndị ọrụ FRSC wụchazịrị n'ebe ahụ ozigbo wee malite ibughasị ihe na ụgbọala ndị ahụ n'ụzọ, iji hụ na e nweghị agbakata akwụrụ n'ebe ahụ.

Kaosiladị, mmadụ ise (nwoke anọ na otu nwaanyị) nọ n'ime ụgbọala atọ ahụ ihe mberede ahụ metụtara enweghị onye ọbụla tụfuru ndụ ya maọbụ nweta ihe mmerụahụ ọbụla.

N'okwu ya banyere nke ahụ, onyeisi ụlọọrụ FRSC na steeti Anambra, bụ CC Andrew A Kumapayi dọrọ ndị na-anyà ụgbọala aka na ntị megide ịgba oke ọsọ, ma dụọ ha ọdụ ka ha na-akpachapụrụ ụgbọala ha anya ma na-elerukwa ya anya etu o kwesiri, iji hụ na ọ nọ n'ezi ọnọdụ, tupu ha eburu ya banye n'okporoụzọ, iji wee belata ihe mberede okporo ụzọ maọbụ ịla ndụ na ngwongwo ụmụ mmadụ n'iyì.