Anyammiri Ala Anyị (Tears of Our Land)

Anyammiri Ala Anyị (Tears of Our Land)

 

Izunna  Okafor dere abụ a

Ala Naịjiria ebegbuo onwe ya n'akwa
Anyammiri anyammiri ebe niile!
Ákwá ụtụtụ, ákwá ndeeri na ákwá arị̀rị̀
Ọnye ga-azọ ala anyị? 

Chi ọbụbọ wèré aka èkpè dupụta ya ụra
Chi ọjọọ ewere akwa arị̀rị̀ dúbàá ya
Ihe na-ebenụ a ka na-ebekwa
Onye ga-azọ ala anyị? 

Naịjiria bụ nne chị ụmụ
Onyeisiala bụ di ọ lụrụ
Nne na nwa ebegbuo onwe ha n'ákwá
Agụụ, anyammiri, akwa arịrị ebe niile
Onye ga-azọ ala anyị? 

Lekene nwaanyị na mma ya
Na ụbara ụmụ chi jiri gọzie ya
Mana di ya ekweghị ka o rite ihe nwa ya
Wee na-amị ya ọbara ka anwụnta Nnewi
Onye ga-azọ ala anyị?

Ezinụlọ ya nọ n'ọgbaghara
Mana di ya anaghị emezị ka nwoke
Égbé ebukọchaala ụmụ ya 
Ndị e gburu egbu akarịa ndị dị ndụ
Mana di ya emeghị ihe ọbụla maọlị
Dịka a gà-asị na ọ macha ihe na-eme
Gbachị nkịtị
Onye ga-azọ ala anyị?

Di ya ezugbuola ohi, ma bube ya ọnụ nri
Ụmụaka ya nọzịkwa n'agụụ, ọbụnadị n'ime ikpo nri ha nwèrè
Ya bụ ògòlì nwaanyị agbaa isi awọ na-erughị eru
Anyammiri ejugokwa ọgọdọ ya
Onye ga-azọ ala anyị? 

Nwoke ahụ agbaala ya ọtọ n'ọmà ahịa
Chaị! 
Agụ nwaanyị ebegbuo onwe ya n'akwa!
Dịka ụwa na-agbázịkwa ọtọ ya elele
Ùgwù e jiri mara ya erughịzịkwa ya aka
Onye ga-azọ ala anyị ?

Ala Naịjiria na-achọ di ọzọ ugbua
Ndị ọ lụrụ alụ agharịpụchaala ya
N'ihi ezùghị òkè n'ihe e ji nwoke eme
Nke bụ di ya anaghị echètékwuzị onwe ya
N'ihi ụbụrụ ịta nchara
Na ihe a gwọrọ agwọ so ya
Onye ga-achị ala anyị?

Iwe eweela ụmụ ya ndị okenye
Ha ji achọrọ nne ha di ọzọ ugbua
Naanị nwoke nwere ùgwù na nsọpụrụ
Ka a na-elegara anya ibunye mmanya ụbọchị ahụ
Ma e wepuchaa úgwùmágànà na ndị òtù ya
Ụmụnne m, ajụọ m, onye ga-alụ mma anyị?

Gị onwe gị sòrò bụrụ nwa ya
Mụ onwe m sòrò bụrụ nwa ya
Ngịga dị n'ọkụ abụghị nkè azụ
Ọ̀ bụ́rụ́ nkè anụ
Ajụọ m ọzọ
Onye ga-alụ mma anyị ?

Gbata PVC gị ugbua
Ka i wee soro zaa ajụjụ a
N'oké ụbọchị ahụ na-abịa nso
Ka anyị lụtara mma anyị di ọzọ
Maka na nke ọ lụrụ alụ emewaala ya obi
Bikonụ̀ ụmụnne m, onye ga-alụ mma anyị ?

© Izunna Okafor, 2022

*************************************

Maka Onye Dere Abụ A:

Izunna Okafor bụ nwaafọ Ebenatọr dị n'okpuruọchịchị ‘Nnewi South’ nke steeti Anambra. Ọ bụ onye edemede iduazị na abụ, bụrụ onye nta akụkọ na onye ikwàlite asụsụ Igbo na-amasị nke ukwuu.

O deela ọtụtụ akwụkwọ na edemede e biputagoro na mpaghara ebe dị icheiche n'ụwa gbaa gburugburu, ma n'asụsụ Igbo, ma n'asụsụ Bekee.

Dịka onye edemede na onye nta akụkọ, o nwetala ntúrú ùgò na nkwanye ùgwù karịrị iri atọ n'ọnụọgụgụ. Nturuùgò na nkwanyeùgwù ya gụnyere: Nigerian Writers Award/Indigenous Writer of The Year 2015/2016; Pita Nwanna Award for Igbo Literature 2015; Nigerian Heritage Icon Award/Young Writer of the Year Federal Republic of Nigeria 2016; Anambra Exclusive Youth Choice Award/Youth Writer of The Year 2016; Future Award Africa 2016/African Prize For Education; SLAM Hero Youth International Award/Innovative Youth of the Year 2016;  Inspire Award/Outstanding Youth in Academics 2017; Ezenwa Ohaeto Prize for Young Nigerian Novelists 2015; Campus Best Writer/Journalist of The Year 2018, tinyere ọtụtụ ndị ọzọ.

Izunna na-ede akwụkwọ na edemede n'asụsụ Igbo na n'asụsụ Bekee nke ọma.

Ọ bụkwa onye isi òtù jikọtara ndị ntorobịa na-ede akwụkwọ n'ala Nigeria, ngalaba steeti Anambra.