Onye Akwụkwala Ụdọ

Apr 20, 2021 - 16:45
 0
Onye Akwụkwala Ụdọ

Izunna Okafor dere abụ a


Gém gém gém gém!
Dùm dùm dùm dùm
Tìkó tìkó tìkó tìkó
Gbám gbám dùm dùm.

Ụzụ akwa na-atụ
Ọ bụ gịnị na-afịọ
Nwa nke mmadụ anwụọla
Mana ọ bụghị ọnwụ gburu ya.

Gịnị na-èkwòzị
Ịkwụ ụdọ na-ekwò
Anyammiri na-ezò
Mkpu akwa na-akpọ.

Onye ọbụla na-agba ụrịọm
Ndị asụmmiri na-abụ
Ọtụtụ na-adụ n'ùbú
Ọtụtụ ekweghịkwa abịarute nso
Cha! Ihe arụ mèrè.

Ótù ihe mere 
Mana ihe atọ ka a na-akwara akwa
Otu onye mere ya
Mana ọtụtụ ka nke ahụ metụtara.

Gịnị bụdị ihe atọ a na-akwara akwa?
Mmadụ nwụrụ, nke ahụ otu
Arụ mere, ọ bụrụ abụọ
Ihe ichu aha dakwàsịrị ndị dị ndụ
Nke ahụ ga-adịkwa ọkpụtọrọkpụ.

Ịkwụ ụdọ bụ ihe arụ
Ma n'anya chukwu 
Ma n'anya mmadụ
Akụkọ ya agaghị akọchakwa akọcha
Maka na ọ na-abụ nwata tote ọ nụrụ

Ịkwụ ụdọ abụghị usoro kacha mma
Ịkwụ ụdọ abụghị ejechaa ọgwụ
Ịkwụ ụdọ anaghị enyekwa ezumike
Maka na onye kwụrụ ụdọ n'eje ọkụ mmụọ
Ebe ọ ga-anọ hụ nke bụ ahụhụ anya

Onye gburu onwe ya egbughịnụ ọchụ
Mana ihe o gburu karịrị ihe gburu ya
Onye o ribìdòrò kọtara nwanne ya
Maka na ọ na-abụ nnụnụ mechie ọnụ ya
Agụụ egbughị ya, akpala afụchie ya ikè.

Onye a gwara agwa ma ọ nụghị anụ
O mee mee ọ hụ ahụ
Agadi nwaanyị kachie ntị wụọ aja
E bute ozu ya n'ofè nke ọzọ
Arịọ m ụnụ niile:
Onye akwụkwala ụdọ.


© Izunna Okafor

What's Your Reaction?

like

dislike

love

funny

angry

sad

wow

Izunna Okafor Izunna Okafor is an award-winning Nigerian novelist, poet, journalist, essayist, editor, translator, publicist, Igbo language activist and administrator who hails from Ebenator in Nnewi South Local Government Area of Anambra State, Nigeria. He writes perfectly in English and Igbo languages, and has published several books in both languages. He has received over 25 awards, and has over 2000 articles published online, both nationally and internationally, cutting across creative writing and journalism. See his full profile at: https://9jabooks.com/profile/484