Nwoke Arụọrọla Nwunye Ya Ụlọ Na-Atụgharị Atụgharị Oge O Mechara Ọtụtụ Mkpesa

Izunna Okafor dere akụkọ a

Ka o nwetechaara ọtụtụ mkpesa dị icheiche site n'aka nwunye ya, otu nwoke, Vokin Kusic arụọrọla nwunye ya ụlọ na-atụgharị atụgharị

Nwoke ahụ, onye bụkwa mmadụ ji aka ya na-echepụta ma na-arụpụta ihe ọhụrụ, mèrè ka a mara na o teela nwunye ya jiri nyebe ya nsogbu, ma na-ekpesa na etu ihu ụlọ ha dị amasịghị ya maọbụ tọọ ya ụtọ, n'ihi na ọ bụ naanị otu ụdị ihu ka o nwere; ma kwuo na ọ chọrọ ụlọ nwere maọbụ ná-egosi ọtụtụ ihu, bụkwa ebe ọ ga-anọ wee na-elegharị anya, na-ahụ anwụ na ndò na ihe ọbụla ọ chọrọ ịhụ n'otu oge, na-ahụkwa ndị mmadụ  na ụgbọala na-agafe agafè.

N'ajụjụọnụ ndị nta akụkọ gbara ya, Maazị Kusic, onye gbara ahọ iri asaa na abụọ kwukwazịrị na ọ bụ mkpesa ahụ na nsogbu ahụ nwunye ya nyegidere mèzịrị o jiri kpebie ma kwe nkwà ịrụrụ ya ụlọ na-atụgharị atụgharị, ka o wee kwụsị inye ya nsogbu, ma nwekwa ike ịdị na-efegharị, na-agbàgharị ma na-atụgharị ụlọ ahụ ka o siri masị ya.

Ụlọ ahụ pụ́rụ́ iche bụ nke a rụrụ n'obodo Srbac, dị na mbà 'Bosnia and Herzegovina'. Ọ na-efegharị ruo mita asaa, ma na-agbanwèkwa agbanwe, si n'igosi ugbõ bàá n'igosi ọhịa, si na ya bàá n'igosi mmiri, tinyere ihe ndị ọzọ ụdịdị ya na-egosi oge ọ na-atụgharị.

Kusic gara n'ihu kọwaa na ụlọ ahụ ga-atụgharị gburugburu n'ime áwà iri abụọ na anọ ma o jiri nwayọ wee tụgharịa, ma tụgharịa gburugburu zuru òkè n'ime tịnkọm tịnkọm iri abụọ na abụọ ma ọ tụgharịa ngwangwa.

O kwuru na ịrụ ụlọ ahụ wèrè ya ahọ isii tupu ọ rụchaa ya, ma e wezùga oge ọ nọ n'ụlọọgwụ anata ọgwụgwọ n'ihi nsogbu o nwere n'óbì. O kwuru na ụlọ ahụ kara ụlọ nkịtị wee sie ike, ọkachasị n'ihe metụtara iguzogide nsogbu ala ọmajijiji na-ebibi ọtụtụ ụlọ nkịtị.

Ọ sị na ọ rịọrọ dọkịta ya ka ọ gbatịwanyekwuo ndụ ya ruo (opekatampe) otu ahọ, ka o wee rụtọpụrụ nwunye ya ụlọ ahụ, na ọ bụrụ na ọ nwụrụ, ị mara na o nweghị onye ọbụla ọzọ ga-ama wee rụchapụ ụlọ ahụ.

O kwukwazịrị na obi dị ya ụtọ na ọ rụchaala ụlọ ahụ ugbua, ka nwunye ya wee kwụsị inye ya nsogbu.