E Jidela Onye Ogbi Ji Isi Na Aka Mmadụ, Tie Ya Gwoogwoo

Izunna Okafor dere akụkọ a

Aka abụọ nọrọ na nsonso a wee ghọọ Maazị Chinedu Okoro otu aka  mgbe a nwụchikọrọ ya ka o ji isi mmadụ, aka mmadụ na ụfọdụ ihe ndị ọzọ n'ime àkpà o bù.

Nke a bụ nke mere na mpaghara Omoku dị na steeti Rivers, bụ ebe a nọrọ wee nwụchikọọ ya bụ nwokorobịa ka o bù àkpà ahụ.

Ya bụ nwaokorobịa, Chinedu Okoro, ka e kwuru na ọ gbara ahọ iri abụọ na atọ, ma bụrụkwa onye ogbi na onye ntị ochi (deaf and dumb).

Ọ bụ oge ndị mmadụ hụrụ ka o bu àkpà ahụ, etu àkpà ahụ dị na etu o siri buru ya ka e jiri màlite inyò ya ènyò. Nke ahụ mezịrị e jiri kwụsị ya, ka e wee nyochaa àkpà ahụ ma chọpụtakwa ihe dị n'ime ya n'eziokwu.

Kaosiladị, o wèzịrị onye ọbụla anya ma mekwa onye ọbụla nọ ebe ahụ 'kpịm' n'ọnụ ngwangwa ha nyòrò anya n'ime akpa ahụ wee hụ isi mmadụ, bụ isi agadi nwaanyị e gburu ọhụrụ, nà aka mmadụ abụọ, tinyere ụfọdụ ihe ndị ọzọ dị n'àkpà ahụ.

Nke a mezịrị ka ndị ọrụ nchekwa ‘ONELGA Security Peace and Advisory Council (OSPAC)’ nwụchikọọ ya bụ nwoke ozigbo, ya na ihe ndị ahụ e nwetegasịrị n'aka ya.

Ka ọ dị ugbua, e nyefèzịrị okwu ahụ n'aka ndị uweojii steeti ahụ, ka ha wee mekwuo nnyocha banyere ya ma mekwa ya ka e si eme ya.