E Jidela Nwa Ahọ Iri Na Atọ Na-Ezu Ohi n'Awka

By Izunna Okafor, Awka, Nigeria

Dịka a sị na ọ na-abụ e kwòghị ìrùrò na gboo, ọ ghọọ ajọ ọhịa, a nwụchikọọla otu nwata nwoke gbara ahọ iri na atọ na-ezu ohi n'Awka bụ isi obodo steeti Anambra. Nwata nwoke ahụ, onye aha ya bụ Ekene Chukwuchebe bụ onye e jidere na ncherịta iru ụlọ ụka Winners Chapel dị na mpaghara okporo ụzọ Ọby Okoli n'Ọkpụnọ.

Dịka akụkọ siri kọọ, ya bụ nwata ka e kwuru na ya na ndị òtù ya ji igwe na akụrụngwa dị iche iche wee na-akpàkasị otu ọnụ ụlọ ahịa dị na ncherịta ihu ụlọ ụka ahụ, wee ruo mgbe ndị ọrụ nchekwa na-eche ya bụ ụlọ ụka pụtara wee nwụchikọọ ya, ebe ndị ọzọ ya na ha riri mbọ mbọ ọsọ.

N'ajụjụ ọnụ a gbara ya, nwa amadi ahụ, bụ onye kwuru na ọ nọ n'ogo nke atọ nke kọleeji ya n'ụlọ akwụkwọ 'Capital City Secondary School' kwètara na ya na ndị òtù ya kụrụ ya bụ akụmakụ n'ezie, ma kwuo na ọ bụ ezie na ha ebughị ụzọ gwa ya na ọ bụ ohi ka ha na-abịa n'ebe ahụ. O mere ka amara ọ bụ nwanne ya nwoke, bụ maazị Eze Chukwuchebe na ndị ọzọ ya na ha sòrò wee bịa ya bụ 'ọrụ' dubàrà ya n'ọnọdụ ahụ, bụ nke o kwuru na ya adanyebeghị na ya kemgbe o jiri bụrụ mmadụ.

N'okwu nke ya, onye nwe ọnụ ụlọ ahịa ebe a bịara ya bụ ohi, bụ maazị Samuel Ọdụmegwu kwuru na o teele mgbe e jiri zube ya ohi n'ebe ahụ, ma kọọ akụkọ bànyere ihe dị iche iche ọ gabigarala n'aka ndị omekome ahụ kemgbe o jiri malite rebe ahịa ebe ahụ.

Ya bụ nwoke, bụ onye na-ere ọgwụ, ihe nwa, mmanya, ude, ihe oriri nakwa ọtụtụ ihe ndị ọzọ e ji enyere ndụ aka, sịrị na o teela ya jiri kpebe ekpere ka a nwụchikọọ ndị ahụ, bụ ndị o kwuru na ha na-abịa akpakasị ọnụ ụlọ ahịa ya oge ọbụla, wee ruo ugbu aka kpaara ya bụ ezeku udele.

Na ntụnye nke ya, otu nwa amadi nọ ebe e jidere ya bụ nwata, bụ maazị Ikechukwu Ọffọr kwuru na o teela ya na ndị òtù ya siri zube ohi, ma nọrọkwa ebe gbaa n'anwụ onyonyoo dị iche iche na-egosi ebe ụfọdụ e jidegoro ya bụ nwata na ndị otu ya n'ohi n'oge gara aga, bụ ebe e setere ha na ihe dị iche iche ha zutere n'ohi.

Otu ọ dị, a hafeela nwata ahụ n'aka ndị uwe ojii steeti ahụ iji wee mee nnyocha miri emi, nwụchikọọ ndị ọzọ, ma kpụpụkwa ha ụlọ ikpe.