A Ga-Agbape Àkwà Mmiri Niger Nke Abụọ n'Ọnwa Febụwarị —Moghalu

A Ga-Agbape Àkwà Mmiri Niger Nke Abụọ n'Ọnwa Febụwarị —Moghalu

Izunna Okafor dere akụkọ a

Gọọmenti etiti ala Nigeria emeela ka a mara na a ga-arụcha ma gbapee àkwà mmiri Niger nke abụọ (bụ "Second Niger Bridge") a na-arụ na steeti Anambra n'ime ọnwa Febụwarị ahọ na-abịa abịa.

Nke a bụ nke e kwupụtara site n'ọnụ onyeisi ụlọọrụ 'National Inland Waterways Agency (NIWA) bụ Maazị George Moghalu, n'okwu ọ gwara ndị ntaakụkọ na nsonso a banyere nke ahụ, bụ nke o sitekwara na ya wee kọwaa na ọrụ na-aga n'ihu n'ebe ahụ kemgbe a malitere ya.

Ọ kpọpụtàsịrị uru dị iche iche àkwà mmiri ahụ gà-eweta na mpaghara ahụ nà etu ọ ga-esi wèta mmepe mà kwalitekwa ọnọdụ akụnụba ala mpaghara ndịda-ọwụwa anyanwụ ala Nigeria ma a rụchaa ya; ọbụladị dịka o gosipụtàkwàrà afọ ojuju ya banyere etu ya bụ ọrụ si aga nà ogoogo e ji arụ ya.

Dịka ọ na-ekele onyeisiala bụ Muhammadu Buhari maka ọmarịcha ọrụ mmepe dị iche iche ọ na-arụ na mpaghara ala Igbo na mpaghara ebe ndị ọzọ dị iche iche n'ala Nigeria kemgbe ọ batara n'ọkwa ọchịchị, Moghalu kwèrè ya nkwà na Ndị Igbo ga-aga n'ihu inye ọchịchị ya nkwàdo zuru òkè.

Ọ kpọpụtasịrị ụfọdụ ọrụ dị iche iche Buharị rụgoro na ihe o megooro Ndị Igbo kemgbe ọ bàtàrà n'ọkwa ọchịchị, ma kwukwa na ya bụ onyeisiala agbapeela atụmatụ ọrụ ịrụ okporoigwe maka ụgbọoloko na Port Harcourt nke steeti Rivers, bụ nke o mere na nsonso a, ma bụrụkwa nke ga-esi na mpaghara steeti niile dị n'ala Igbo wee gaa ma a rụchaa ya.

O jikwàzịrị ohere ahụ wee kpọkuo ndị obodo dị iche iche ka ha na-echekwa ma na-elekọta ihe dị iche iche gọọmenti rụrụ na mpaghara aha, ọbụladị dịka ọ katọrọ etu ndị omekoome sizị awakpògasị ụlọọrụ gọọmentị aghara-aghara na mpaghara ebe dị iche iche, ma kọwaa ya dịka ihe jọgburu onwe ya, kpọkukwa ndị na-eme ihe dị etu ahụ ka ha sepu aka na ya.