Ụlọikpe atụọla nwaanyị mkpọrọ màkà ịwụ nwunye di ya mmiri ọkụ

Izunna Okafor dere akụkọ a

Otu ụlọikpe Majie dị n'Ilorin bụ isi obodo steeti Kwara akpụgharịala otu nwaanyị gbara afọ iri anọ na abụọ ma tụọ ya mkpọrọ maka ịwụ nwunye di ya mmiri ọkụ.

Ya bụ nwaanyị, bụ Oriakụ Lola Abdulsalam nọrọ na nsonso a wee wụọ Oriakụ Bilikisu Abdulsalam mmiri ọkụ, bụ nke wochasịrị ya ahụ ma bokwa ya àpà n'ụdị dị icheiche.

Ọ bụ ndị uweojii nwụchikọrọ nwaanyị ahụ, wee kpụpụ ya ụlọikpe maka na ime ihe megidere mpaghara 247 na 292 nke amụma iwu a kpọrọ penaa koodu (penal code). Ndị uweojii ahụ ahụ kwuru na nwaanyị ahụ kpàrị̀rị̀ Oriakụ Bilikisu, merụọ ya ahụ ma mee ya ihe akaje dị icheiche mgbe ọ chọrọ isi n'ụzọ azụ ụlọ kpapụ oke nwụrụ anwụ.

Ha kwùrù na o buru ụzọ malite ịkụ nwunye di ya ahụ isi azịza, ma na-akpọkwa ya amosu. Ha sị na oge ọ na-abara nwunye di ya ahụ mba, na o jikwara gbabaa n'ụsọekwu ya, bute mmiri ọkụ sụrụ asụ, wee bịa wụọ ya nwunye di ya n'ahụ, nke wochasịrị ya ihu, ara, azụ, aka, nà akụkụ ahụ ya ndị ọzọ.

Nke a mezịrị ka ndị agbataobi na ụfọdụ mmadụ ndị ọzọ nọ na gburugburu ebe ahụ nye aka buru ya bụ nwaanyị gaba ụlọọgwụ ozigbo ‘Cottage Hospital, Olorunshogo’ dị n'Ilorin ahụ maka inye ya ọgwụgwọ na nlekọta kwesiri ekwesi.

Na nkabi ikpe ya oge ọ nụchara mkpesa site n'aka òtù abụọ ahụ, onye Majie nọ n'isi ikpe ahụ, bụ Majie Ibrahim Dasuki kwùrù ka a tụnyegodi nwaanyị ahụ n'ụlọ mkpọrọ dị n'Oke-Kura, ka ọ ka nọrọgodi ebe ahụ na-anara ikuku, wee ruo mgbe ọzọ a ga-eleba okwu ahụ anya.

O bụgharịzịkwara ikpe ahụ ka ọ dịzie n'abalị isii nke ọnwa Maachị afọ a.