N'Awka, Odide Ebidola Ọrụ Mmetụaka n'Okporoụzọ Mebiri Emebi

N'Awka, Odide Ebidola Ọrụ Mmetụaka n'Okporoụzọ Mebiri Emebi

Izunna Okafor dere akụkọ a

Ọ na-abụ e jikọọ aka buo ozu enyi, ọ dị mfe; maka na otu onye anaghị achụ ngwere mgbahige aja.

Ka ọ dị taa, otu nwaamadi ọrụ obiebere na-atọ ụtọ, bụ Maazị Ikechukwu Odide ebidola ọrụ mmetụaka na mpaghara ebe ahụ mebiri emebi n'okporoụzọ ahụ e si abanye ime ogige Commissioners Quarters dị n'Awka bụ isi obodo steeti Anambra.

Ya bụ ọrụ mmetụaka bụ nke a malitere na nsonso a, ma bụrụkwa nke na-agawanye n'ihu ugbua, dịka a hụrụ ụfọdụ ígwè ọrụ na ndị ọrụ ka ha na-agawanye n'ihu n'arụmọrụ ha ebe ahụ.

Dịka ọnọdụ siri gbata kwụrụ n'ebe ahụ ugbua, e dozigharịala ọ̀wammiri mebiri emebi n'ebe ahụ, ma ka na-arụgharị ụfọdụ mpaghara ebe mebisiri emebi n'okporoụzọ ahụ, iji mee ka ọ dịkwa larịị ọzọ ma dịkwa mma ụkwụ na mma ụgbọala. Ụfọdụ ndị e ji okwu ha agba izu na steeti ahụ, nke gụnyere Osote Gọvanọ, bụ Dọkịta Onyekachukwu Ibezim, na ndị ọzọ, agaala njem nleta n'ebe ahụ ịhụ ka ya bụ ọrụ si aga; bụkwa ebe ha nọrọ wee too Maazị Odide maka ya bụ ezi ọrụ obiebere.

N'okwu ya banyere nke ahụ, ya bụ nwaamadi na-arụ ya bụ ọrụ ma bụrụkwa onyeisioche ụlọọrụ ngo ji ya bụ ọrụ, bụ Maazị Odide kọwàrà na ọ malitere ya n'ihi mkpa ọ hụtara ya bụ okporoụzọ dị na etu ọnọdụ ya bụ ụzọ dị, ma mekwa ka a mara na Osote Gọvanọ, Dọkịta Ibezim bụ ezi enyi ya, nke bụkwa otu n'ime ihe kpaliri ya ịbagide na ya bụ ọrụ.

O mere ka a mara na nke ahụ bụ otu n'ime ụzọ o siri kpebie inye aka na ịtụnye ụtụ n'ịkwàlite mmepe obodo na steeti ya.

O kwupụtàrà olileanya o nwere ịgbatịwanye ya bụ ọrụ ka o rutekwa ebe ndị ọzọ, ọbụladị dịka o kèlèrè ọchịchị steeti ahụ maka inye ya ohere ahụ iji tụnye ụtụ na mmepe steeti ya; ma kwe nkwa iji obi ya niile rụọ ya bụ ọrụ n'ogoogo dị elu karịa ka a tụrụ anya.