Gọọmenti Anambra Agbapeela Mmalite Ọrụ Okporoụzọ Iteghete 

Izunna Okafor dere akụkọ a

Ọchịchị steeti Anambra ekwupụtala njikere ya ịrụ ọtụtụ okporoụzọ ụzọ na mpaghara ebe dị icheiche na steeti ahụ tupu ahọ 2022 apịachie akwụkwọ.

Aka na-achị steeti ahụ bụ Gọvanọ Chukwuma Soludo kwupụtàrà nke a oge ọ na-agbape mmalite ọrụ okporoụzọ ruru iteghete n'ọnụọgụgụ na mpaghara ebe dị icheiche na steeti ahụ.

Ọrụ okporoụzọ ụzọ bụgasị nke ọ gbapere ụbọchị Wenezdee na mpaghara Okpoko dị n'okpuruọchịchị ime obodo Ogbaru; ma bụrụkwa nke mgbakọta ogologo ya ruru kilomita 14.3.

Ha gụnyèrè: Okporoụzọ Obodoukwu—Owerri Road (5.77km), Okporoụzọ Oguagu- Ik Onuorah-Anumudu-Mgbua- Amazu-Owerri (2.97km), Okporoụzọ Edeh Road-School Road-Awalite - Ojoto-Owerri (1.48km) Okporoụzọ School Road- Umuobom Street-Ojoto Street Junction (0.58km), Okporoụzọ Umuobom street-Ojoto Street Junction-Adazi-Ani street-Owerri Road (0.77km), Okporoụzọ Umenweke-Umeojiakor (0.58km), Okporoụzọ Ojoto Junction-Anumudu (0.99km), Okporoụzọ Uzii Street - Mission Street (0.54km) na Okporoụzọ Anumudu Street - GMI Road (0.38km). 

N'okwu ya n'ebe ahụ oge ọ na-agbape ọrụ okporoụzọ ahụ, Gọvanọ Soludo kwùrù na nke ahụ so n'otu n'ime ihe dị icheiche o kwere nkwà ime ma ọ banye n'ọchịchị, bụ nke o kwupụtàrà mgbe ọ gara ịchụ nta nkwàdó n'okpuruọchịchị Ogbaru, wee hụ na ndị bi na mpaghara ebe ahụ na-ata ahụhụ, nke mezịrị o jiri kpebie na ọ ga-agbatara ha ọsọ enyemaka n'ụdị pụrụ iche ma kwalitekwa ọnọdụ mmepe Steeti Anambra n'izugbe ma ọ banye n'ọkwa.

Ọ kpọpụtasị̀rị̀ uru dị icheiche ezi ọnọdụ okporoụzọ bara n'ịkwàlite mmepe, ma kwe nkwà na a ga-arụcha ụzọ ahụ oge a tụrụ anya ma rụsikwa ha ike, nke na ha ga-anọkarị ahọ iri abụọ.

O kwuru na ọ ga-agbatịwanyekwa ọrụ ọma ahụ ruo na mpaghara ebe ndị ọzọ na gburugburu steeti ahụ, ọbụladị dịka ọ kpọkùrù ndị Anambra ka ha gaa n'ihu na-enye ọchịchị ya nkwàdó, ma zekwaara ime maọbụ itinye aka n'ihe maọbụ akparamagwa ọbụla ga-adọghachi aka elekere azụ n'ịkwàlite ọnọdụ mmepe steeti ahụ.